શોભા શી કહું રે રૂડી, વરણન કરતાં જાય ચિત્ત બૂડી

શોભા શી કહું રે રૂડી, વરણન કરતાં જાય ચિત્ત બૂડી;
          હરિવર જોયા રે રંગમાં, મોહી હું તો રસિયાજીના અંગમાં...૧
ઉદર અનુપમ રે નીરખી, ઉપમા પીપળ પાનના સરખી;
         ત્રિવળી સુંદર રે શોભે, જોઈ જોઈ ચિત્તડાં મારાં લોભે...૨
નાભિ ઊંડી રે રૂપાળી, બ્રહ્મા બેસે ત્યાં આસન વાળી;
         કટિલંક જોઈને રે મનમાં,મૃગપતિ લાજી રહ્યો મહાવનમાં...૩
હરિએ ઉપવીત રે ધારી, મુનિનાં મનને આનંદકારી;
         નીરખી આનંદ રે પામી, આવા રૂડા પ્રેમસખીના સ્વામી...૪