અવિનાશી આવો રે, જમવા કૃષ્ણહરિ;
શ્રીભક્તિધર્મ સુત રે, જમાડું પ્રીત કરી ...૧
શેરડીઓ વાળી રે, ફૂલડાં વેર્યાં છે;
મળિયાગરે મંદિર રે, લીંપ્યાં લેર્યાં છે ...૨
ચાંખડીઓ પે’રી રે, પધારો ચટકંતા;
મંદિરીએ મારે રે, પ્રભુજી લટકંતા ...૩
બાજોઠે બેસારી રે, ચરણકમળ ધોઉં;
પાંપણીએ પ્રભુજી રે, પાવલિયા લોઉં ...૪
ફુલેલ સુંગધી રે, ચોળું હું શરીરે;
હેતે નવરાવું રે, હરિ ઊને નીરે ...૫
પેરાવું પ્રીતે રે, પીતાંબર ધોતી;
ઉપરણી ઓઢાડું રે, અતિ ઝીણી પોતી ...૬
કેસર ચંદનનું રે, ભાલે તિલક કરું;
વંદન કરી વિષ્ણુ રે, ચરણે શીશ ધરું ...૭
ઉર હાર ગુલાબી રે, ગજરા બાંધીને;
નીરખું નારાયણ રે, દૃષ્ટિ સાંધીને ...૮
શીતળ સુંગધી રે, કળશ ભર્યા જળના;
ઉલેચ બાંધ્યા છે રે, ઉપર મખમલના ...૯
કંચન બાજોઠે રે, બિરાજો બહુનામી;
પકવાન પીરસી રે, થાળ લાવું સ્વામી ...૧૦
મોતૈયા લાડુ રે, સેવૈયા સારા;
તમ કાજ કર્યા છે રે, લાખણશાઈ પ્યારા ...૧૧
મગદળ ને સેવદળ રે, લાડુ દળના છે;
ખાજા ને ખુરમા રે, ચૂરમા ગોળના છે ...૧૨
જલેબી ઘેબર રે, બરફી બહુ સારી;
પેંડા પતાસાં રે, સાટા સુખકારી ...૧૩
મરકી ને મેસુબ રે, જમો જગવંદનજી;
સુતરફેણી છે રે, ભક્તિનંદનજી ...૧૪
ગગન ને ગાંઠિયા રે, ગુંદવડા વાલા;
ગુલાબપાક જમજો રે, ધર્મતણા લાલા ...૧૫
એલાયચી દાણા રે, ચણા છે સાકરિયા,
ગુંદરપાક સુંદર રે, જમજો ઠાકરિયા ...૧૬
ટોપરાપાક ટાઢો રે, સકરપારા સારા;
સેવો ઘી સાકર રે, તમે છો જમનારા ...૧૭
કેસરિયો બીરંજ રે, ગળ્યો ને મોળો છે;
સાકરનો શીરો રે, હરીસો ધોળો છે ...૧૮
લાપસી કંસારમાં રે, ઘી બહુ રસબસ છે;
ખીર ખાંડ ઘી રોટલી રે, જમો બહુ સરસ છે...૧૯
બદામ ચારોળી રે, દ્રાક્ષ તે નાંખીને;
દૂધપાક કર્યો છે રે, જુઓ હરિ ચાખીને ...૨૦
પૂરી ને કચોરી રે, પૂરણપોળી છે;
રોટલીઓ ઝીણી રે, ઘીમાં ઝબકોળી છે ...૨૧
પાપડ ને પૂડલાં રે, મીઠા માલપૂડા;
માખણ ને મીસરી રે, માવો દહીંવડાં ...૨૨
ઘઉંની બાટી રે, બાજરાની પોળી;
ઝાઝી વાર ઘીમાં રે, હરિ મેં ઝબકોળી ...૨૩
તલસાંકળી સુંદર રે, બીજી ગોળપાપડી;
ગાંઠિયા ને કળી રે, ત્રીજી ફૂલવડી ...૨૪
ભજિયાં ને વડાં રે, સુંદર દહીંથરિયાં;
વઘાર્યા ચણા રે, માંહી મીઠું મરિયાં ...૨૫
ગુંજા ને મઠિયા રે, ફાફડા ફરસા છે;
અળવી આદાનાં રે, ભજિયાં સરસાં છે ...૨૬
કંચન કટોરે રે, પાણી પીજોજી;
જે જે કાંઈ જોઈએ રે, તે માગી લેજોજી ...૨૭
રોટલી રસ સાકર રે, જમજો અલબેલા;
રાયણ ને રોટલી રે, ખાંડ કેળાં છેલા ...૨૮
મોરબા કર્યા છે રે, કેરી દ્રાક્ષ તણા;
સુંદરવર જમજો રે, રાખશો મા મણા ...૨૯
કટોરા પૂર્યા રે, સુંદર શાકોના;
કેટલાક ગણાવું રે, છે ઝાઝાં વાનાં ...૩૦
સુરણ તળ્યું છે રે, સુંદર ઘી ઝાઝે;
અળવી ને રતાળુ રે, તળ્યાં છે તમ કાજે ...૩૧
મેં પ્રીત કરીને રે, પરવળ તળિયાં છે;
વંતાક ને વાલોળ રે, ભેળાં ભળિયાં છે ...૩૨
કંકોડા કોળાં રે, કેળાં કારેલાં;
ગલકાં ને તુરિયાં રે, રૂડાં વઘારેલાં ...૩૩
ચોળી વાલોળો રે, પ્રીત કરી તળિયો;
દૂધિયા ને ડોડા રે, ગુવારની ફળીઓ ...૩૪
લીલવાં વઘાર્યા રે, થયા છે બહુ સારાં;
ભીંડાની ફળીઓ રે, તળિયો હરિ મારા ...૩૫
ટાંકો તાંદળિયો રે, મેથીની ભાજી;
મૂળા મોગરીઓ રે, સુવાની તાજી ...૩૬
ચણેચી ને ડોડી રે, ભાજી સારી છે;
કઢી ને વડી રે, સુંદર વઘારી છે ...૩૭
નૈયાનાં રાઈતાં રે, અતિ અનુપમ છે;
મીઠું ને રાઈ રે, માંહી બે સમ છે ...૩૮
કેટલાક ગણાવું રે, પાર તો નહિ આવે;
સારું સારું જમજો રે, જે તમને ભાવે ...૩૯
ખારું ને મોળું રે, હરિવર કહેજોજી;
મીઠું મરી ચટણી રે, માગી લેજોજી ...૪૦
અથાણાં જમજો રે, સુંદર સ્વાદું છે;
લીંબુ ને મરચાં રે, આમળાં આદું છે ...૪૧
રાયતી કેરી રે, કેરી બોળ કરી;
ખારેક ને રાઈમાં રે, નાખ્યાં લવિંગ મરી ...૪૨
કેરાં ને કરમદાં રે, તળી છે કાચરિયો;
બીલાં બહુ સારાં રે, વાંસ ને ગરમરિયો ...૪૩
દાળ ને ભાત જમજો રે, તમને ભાવે છે;
ચતુરાઈ જમતાં રે, પ્રીતિ ઊપજાવે છે ...૪૪
પખાલીના ભાતમાં રે, સુંદર સુંગધ ઘણો;
એલચીનો પીરસ્યો રે, આંબામોર તણો ...૪૫
મેં કઠણ કરી છે, દાળ હરિ તુરની;
પાતળી પીરસી રે, કે દાળ મસુરની ...૪૬
મગ ને અડદની રે, કરી છે ધોઈને;
ચોળા ને ચણાની રે, ઘીમાં કરમોઈને ...૪૭
દહીં ને ભાત જમજો રે, સાકર નાખી છે;
દૂધ ને ભાત સારું રે, સાકર રાખી છે ...૪૮
દૂધની તર સાકર રે, ભાત જમજો પહેલાં;
સાકર નાખીને રે, દૂધ પીજો છેલા ...૪૯
જે જે કાંઈ જોઈએ રે, તે કે’જોજી અમને;
કાંઈ કસર રાખો તો રે, મારા સમ તમને ...૫૦
જીવન જમીને રે, ચળું કરો નાથ;
ચંદન ગારેશું રે, ધોવરાવું હું હાથ ...૫૧
તજ એલચી જાયફળ રે, જાવંતરી સારી;
કાથો ને ચૂનો રે, સરસ છે સોપારી ...૫૨
નાગરવેલીનાં રે, પાન લાવી પાકાં;
ધોઈને લૂછયાં છે રે, અનુપમ છે આખાં ...૫૩
માંહી ચૂરણ મેલી રે, બીડી વાળી છે,
લલિત લવિંગની રે, ખીલી રસાળી છે ...૫૪
મુખમાં હું મેલું રે, બીડી પ્રીત કરી;
આરતી ઉતારું રે, પ્રભુજી ભાવ ભરી ...૫૫
ફૂલસેજ બિછાવી રે, પોઢો પ્રાણપતિ;
પાવલિયા ચાંપું રે, હૈડે હરખ અતિ ...૫૬
થાળ ગાયો પ્રીતે રે, ધર્મકુલ મુગટમણિ;
આપો પ્રેમાનંદને રે, પ્રસાદી થાળ તણી ...૫૭