સખી વાત વિતી કહું મારી, મળ્યા વાટમાં કુંજવિહારી

સખી વાત વિતી કહું મારી, મળ્યા વાટમાં કુંજવિહારી...ટેક.
દશ વીશ સખા લઈ સંગે, પીળી પામરી ઓઢી અંગે રે;
		રોક્યો મારગ આવી મોરારી...મળ્યા૦ ૧
મારે માથે હતી મહિ ગોળી, નાંખી નાનકડે તે ઢોળી રે;
		મને મુખથી બોલ્યા ધૂતારી...મળ્યા૦ ૨
મારો હાથ ઝાલ્યો જદુનાથે, કર્યો ઝગડો મુજ સંગાથે રે;
		લીધો કંઠથી હાર ઉતારી...મળ્યા૦ ૩
હતી છબી એની મરમાળી, જાણે મન પકડયાની જાળી રે;
		લીધી મૂરતિ મનમાં ઉતારી...મળ્યા૦ ૪
છે એ જાદુગરો જગદીશ, કર્યું જાદુ એણે કરી રીસ રે;
		મારી શૂધ બૂધ સઘળી વિસારી...મળ્યા૦ ૫
હવે રોગ થયો ઉર એવો, દાડી દાડી જદુપતિ જોવો રે;
		વધે છે ઉર પ્રેમ ખુમારી...મળ્યા૦ ૬
કાં તો બુટ્ટી કશીક સુંઘાડી, મને પ્રેમના પાસમાં પાડી રે;
		બહુનામી ઉપર બલિહારી...મળ્યા૦ ૭
રઘુવીરસુત સુતના સ્વામી, વસ્યા ઉરમાં અંતરજામી રે;
		અમે જીવીએ એને સંભારી...મળ્યા૦ ૮