પદ- ૬૨ ………………………૧/૨
નીતિ વિષે.
(રાગ દક્ષિણી લાવણી, તાલ દાદરા)
“ નાથ નવ કરો , બાત ઘર જવાની રે, ” એ રાગ પ્રમાણે..
પ્રિય હરિજનો વાત કહું સારી રે,
નીતિ વિશેષ ધરો હમેશ, ટળશે ક્લેશ , સુખ અશેષ
પામશે મુરારી રે. પ્રિય હરિજનો. (ટેક)
ધરમથી રીઝે ધર્મના કુમાર રે,
અખિલ ઇશ, શ્રીજગદીશ, તેને ભજીશ, તોજ તરીશ;
ભવસિંધુ આ ભારી રે. પ્રિય હરિજનો. (૧)
સત્યને દયા જે ધરે નરનારી રે,
ઉપજે જ્ઞાન, ટળશે માન, હરિનું જ્ઞાન, સુણશે કાન;
ચિત્તવૃત્તિ સુધારી રે. પ્રિય હરિજનો. (૨)
નીતિ ધરી હરિમાં કરે જે પ્રીતિ રે,
દુઃખથી દૂર , થઇ જરૂર, પામશે નૂર, એ ભરપૂર;
અતિ થઇ અવિકારી રે. પ્રિય હરિજનો. (૩)
અમૃતપાનથી અમર શરીર થાય રે,
નીતિથી તેમ, પામશો ક્ષેમ, તજીને વ્હેમ, ધરજો પ્રેમ;
વિનવી વિશ્વવિહારી રે. પ્રિય હરિજનો. (૪)
_______________________________________________
દક્ષ= ડાહ્યા, ભવસિંધુ= સંસારસમુદ્ર, અવિકારી = વિકાર રહિત.