પદ ૧૯૧ ……………………..૧/૩
ઉદ્ધવપંથનાં સર્વધામના મુખ્ય દેવનું સ્મરણ
(રાગ કલ્યાણ)
“ નટવર નંદલાલ રૂપ દેખીકે લોભાની, ” “ દેખીકે લોભાની
રંગ છેલડો ગુમાની ; નટવર. “ એ રાગ પ્રમાણે.
વંદુ ઉદ્ધવ પંથ ધામ, દેવને સંભારી;
દેવને સંભારી , નાખું તન મન ધન વારી. વંદુ ઉદ્ધવ. (ટેક)
પ્રથમ વંદુ મુખ્ય ધામ, વૃત્તાલય જેનું નામ;
લક્ષ્મીપતિ મુખ્ય દેવ, વિશ્વ મંગળકારી. વંદુ ઉદ્ધવ. (૧)
ભુવન કોટી તણા ભૂપ , શ્રીહરિકૃષ્ણજી અનૂપ;
ધર્મભક્તિ વાસુદેવ, વૃંદાવનવિહારી. વંદુ ઉદ્ધવ. (૨)
રાજે શ્રી રણછોડરાય, જોઇ જોઇ આનંદ થાય;
દર્શનથી પાપ જાય, એવા એ અધહારી. વંદુ ઉદ્ધવ. (૩)
વંદુ ધામ દુરગપૂર , ધારુ ગોપીનાથ ઉર;
રાધાજી સાથે જરૂર , સુંદર સુખકારી. વંદુ ઉદ્ધવ. (૪)
જીર્ણનગર કરું સેવ , રાજે રાધારમણ દેવ;
માણાવદર બાલમુકુંદ છબી છટા ભારી. વંદુ ઉદ્ધવ. (૫)
ઉનામાં શોભે અનૂપ , શ્રીહરિકૃષ્ણજી સ્વરૂપ;
કોટી ભુવન ભૂપ જેહ, અધિક ઉપકારી. વંદુ ઉદ્ધવ. (૬)
ગોંડલમાં સુખધામ, ધર્મભક્તિ ઘનશ્યામ;
ધોલેરામાં મદનમોહન, મનોહર મોરારી. વંદુ ઉદ્ધવ. (૭)
શ્રીહરિકૃષ્ણજી દયાળ , રાજે સ્તંભપુર રસાળ;
વટપુરે શ્રીપતિ છબી , વિશ્વથકી ન્યારી. વંદુ ઉદ્ધવ. (૮)
હલધર હરિકૃષ્ણ નામ , રાજે ભૃગુપુર ધામ;
ધર્મભક્તિ રેવતીજી, ઓપે આનંદકારી. વંદુ ઉદ્ધવ. (૯)
નારાયણમુનિ આપ, સુરત વિષે નિષ્પાપ;
મુંબઇમાં ગુણવંત , ગૌલોકવિહારી. વંદુ ઉદ્ધવ. (૧૦)
શ્રીપતિ બુરાનપુર , હરિકૃષ્ણજી હજુર;
વિશ્વમાં પ્રતાપ જેનો, વિમળ વિજયકારી. વંદુ ઉદ્ધવ. (૧૧)
ઉત્તમ સહુ ધામ એહ , પાઠ કરે પ્રાણી જેહ;
તેના ઉપર રીઝે સદા; વિશ્વના વિહારી. વંદુ ઉદ્ધવ. (૧૨)
____________________________________________
લક્ષ્મીપતિ= લક્ષ્મીનારાયણ દેવ, જીર્ણનગર= જુનાગઢ.