૫૬ પદ-૧/૧/૬૬
(ઢાળ- મારી સાર લેજો અવિનાશી રે.)
વરઘોડે ચડ્યા હરિ રાયે, જન જોઇ જોઇ રાજી થાય;
વરઘોડાની શોભા તે જોઇ, રહ્યા સુરનર મુનિવર મોહી. ૧
શણગાર્યા છે ઘોડા ને હાથી, રૂડા શોભે છે હરિના સાથી;
ચડ્યા જાદવરાય વરઘોડે શોભે જાદવ તોડે મકોડે. ૨
દેવ હરખ ભર્યા સર્વે આવ્યા, નિજ નારીયો સંગ લાવ્યા;
વાજે દેવનાં વાજાં અપાર, શબ્દ છાઇ રહ્યો દિશ ચાર. ૩
નાચે અપ્સરા ગાંધર્વ ગાય, ઉપર પુષ્પની વૃષ્ટિ થાય;
હરિ મોર મુગટ શિર ધરિયો, કોટી મદનતણો મદ હરિયો. ૪
કીધો શૃંગાર રસ અંગિકાર, મુરછા પામ્યા દેવ નરનાર;
હરિવર હાથીયે બેસી નીસર્યા, જોઇ મુનિવર લોચન ઠારીયાં. ૫
ગાય માનની મંગળ ગીત, જોઇ હરિવર ઉપજી છે પ્રીત;
હરિને ચમર છત્ર શિર છાજે, આગે અગણિત વાજાં વાજે. ૬
આગે ઉડે છે આતશબાજી, થાયે નર ત્રિયા જોઇને રાજી;
આગે બોલે બહુ છડીદાર, દેવ વરસે સુમન વારમવાર. ૭
અસવારી ને આગે ગણેશ, ઈંદ્ર બ્રહ્મા શિવજીને શેષ;
શોભા જોઇ દેવ થયા રાજી. દેખી દુરીજન બળિયા દાજી. ૮
જન જુવે પ્રભુજીને પ્રીતે, જાણે ચિત્ર આલેખ્યાં ભીતે;
થયા પ્રફુલિત જોઇ મુનિ વૃંદ, બલીહારી જાય પ્રેમાનંદ. ૯