જ્ઞાનજીવન તમને, પોકારે (૨) આવો હરિ આવો હવે મારી વહારે;
ભૂલ્યો મારે, ભારે ભારે, થાય વારે વારે;
તારા વિના શ્યામ મને કોણ રે સુધારે...જ્ઞાનજીવન૦ ટેક.
કર્તા કે’વરાવું, મનમાં હરખાવું, પછી ગભરાઉં, અતિ શરમાઉં;
તારા વિના કર્તા નથી સમજુ મન મારે,
અખંડ એવું રે’તું નથી ભૂલું વારે વારે;
ભૂલું નહિ હવે, પળવારે (૨)...આવો૦ ૧
યશ તને દેવો, મારે નથી લેવો, કરું ઠરાવ એવો, રે’તો નથી તેવો;
તારા વિના કોણ કરે હરિ મારું સારું,
જવું નથી વાલા મારે તુજ વિના બારું;
માયા કાઢે તારાથી, બહારે (૨)...આવો૦ ૨
શુદ્ધ બ્રહ્મ થાઉં, ભ્રમ ભૂલી જાઉં, દાસ તારો થાઉં, તુંમાં ડૂબી જાઉં;
એવો કરો પાપ હરો દયા કરો સ્વામી
કરગરીને કહું હવે ટાળો મારી ખામી;
કરવી પડશે દયા તો, વધારે (૨)...આવો૦ ૩
