અનંત લીલા કરી હરી, આપી સુખ અપાર;
ભાર ઉતારી ભૂમિતણો, તાર્યા નર ને નાર. ૧
સર્વે માથે મારી મેખને, નિજ મત અનુપ;
ચલાવ્યો સર્વોપરી હરી, સુંદર સુખરૂપ. ૨
મચ્છરૂપ ધરી માવજી, સત્યવ્રત ઉગાર્યો;
કચ્છાવતાર ધરી કરી, મંદરાચલ ધાર્યો. ૩
વારાહરૂપ ધરી હરી, વસુધા ગોતી લાવ્યા;
માર્યો રિપુ હિરણ્યાક્ષને, માહા પ્રાક્રમી કાવ્યા. ૪
રૂપ ધરી નરસિંધનું, પ્રેહેલાદ ઉગાર્યો;
સ્થંભ ફાડી પ્રગટ્યા પ્રભુ, માહા અસુર માર્યો. ૫
વામનરૂપ ધરી વળી, બળી છલ્યો વિહારી;
નક્ષત્રી પૃથ્વી કરી, ફરસી કર ધારી. ૬
રામરૂપ ધારી મારીયો, માહા રાવણ રાજ;
કૃષ્ણવતાર ધરી કરી, કર્યા કૈકનાં કાજ. ૭
મોહ પમાડ્યા દૈત્યને, ધરી બુદ્ધ સ્વરૂપ;
કલિ અંતે કલકિ થશે, હય ચઢી અનુપ. ૮
જ્યાં જેવું કામ તેવું કર્યું, ધર્યું રૂપ ધરાપે;
અગણિત જીવને તારવા, આવ્યા અવતારી આપે. ૯
થયો નથી થશે નહી, આવો અવતાર;
અવિનાશાનંદનો નાથજી, અવતારી આ વાર. ૧૦