પદ ૪૮
અલૌકિક ગુણ તમારા રે, સદા સુખધામ અમારા રે ટેક.
દયા ક્ષમાદિક ગુણ અલૌકિક, કલ્યાણકારી અપાર;
આપ સ્વરૂપમાં અખંડ રહે છે, વિવેક સાર વિચાર.
કૃપાળુ ચિત્ત ઉદારા રે અલૌકિક.૧
ક્રોધ ટાણે પણ ક્રોધ ન વ્યાપે, કામ ટાણે નહીં કામ;
લોભ સમયમાં લોભ ન આવે, એવા છો ઘનશ્યામ.
ધૈર્યવાન ધર્મ દુલારા રે. અલૌકિક.૨
સત્ય સંકલ્પ સદાય તમારો, જે ધારો તે થાય;
તેનું નથી અભિમાન તમારે, વેદ ગીતા એમ ગાય.
કોટિ કોટિ જગદાધારા રે. અલૌકિક.૩
અધિક સામર્થ્ય અધિક શક્તિ, અધિક પ્રૌઢ પ્રતાપ;
તો પણ વિમુખ કટુક વચન, ક્ષમા કરો છો આપ,
બીજા એવા કોણ થનારા રે, અલૌકિક.૪
આપના એક અંગોઠા વડે આ, ડોલે બ્રહ્માંડ અનેક;
ગર્વ નથી તેનો આપને અંતર, એવી તમારી ટેક.
સૃષ્ટિના સરજનહારા રે. અલૌકિક.૫
આપમાં જે ગુણ અખંડ રહે છે, બીજાને દુર્લભ તેહ;
આપ ચરણનું શરણ પામી, સેવા સજે અતિ સ્નેહ.
આવે તેમાં ગુણ તમારા રે. અલૌકિક.૬
સકલ જીવોના પ્રાણ ને નાડી, પ્રભુ તમારે હાથ;
આપ ઇચ્છા વિણ તરણું ન તૂટે, અનાથના પણ નાથ.
નારણદાસના પ્યારા રે. અલૌકિક.૭