પ્રગટ હરિ મુજને મલ્યારે લોલ

પ્રગટ હરિ મુજને મળ્યા રે લોલ,
	કાંઈ કહ્યામાં ના’વે વાત મારી બેની...પ્રગટ૦ ટેક.
આજ દીનબંધુ અઢળક ઢળ્યા રે લોલ,
	પોતે પુરુષોત્તમ સાક્ષાત મારી બેની...પ્રગટ૦ ૧
એ તો પ્રકૃતિપુરુષ થકી પર છે રે લોલ,
	એ તો અક્ષરતણા આધાર મારી બેની...પ્રગટ૦ ૨
એ તો રાધા રમાના વર છે રે લોલ,
	એનો નિગમ ન પામે પાર મારી બેની...પ્રગટ૦ ૩
એ તો રાજાધિરાજપણે રાજતા રે લોલ,
	એ તો ત્રિભુવનપતિ ભગવાન મારી બેની...પ્રગટ૦ ૪
એ તો સુરનર મુનિ શીશ છાજતા રે લોલ,
	મનમોહન રૂપનિધાન મારી બેની...પ્રગટ૦ ૫
મહામુક્ત પૂજે જેની પાદુકા રે લોલ,
	એવા પરમ પુરુષ મહારાજ મારી બેની...પ્રગટ૦ ૬
જેને ઘડિયે ન મેલે રમા રાધિકા રે લોલ,
	એવા દુર્લભ સુલભ થયા આજ મારી બેની...પ્રગટ૦ ૭
નરવિગ્રહ ધર્યો કરુણા કરી રે લોલ;
	લીધો દ્વિજકુળે અવતાર મારી બેની...પ્રગટ૦ ૮
પ્રેમાનંદનો સ્વામી આજ શ્રીહરિ રે લોલ,
	મુક્તિ આપી કરે ભવપાર મારી બેની...પ્રગટ૦ ૯