પ્રભુ પ્રગટ થયા છે આ સમે રે લોલ,
શ્રીકૃષ્ણ કમળદળ નેણ અવિનાશી...પ્રગટ૦ ટેક.
જેને સુરપતિ નરપતિ સહુ નમે રે લોલ,
એવા ધરમકુંવર સુખદેણ અવિનાશી...પ્રગટ૦ ૧
જે ગોકુલચંદ નંદ લાડીલો રે લોલ,
તે જ ભક્તિ ધરમસુત શ્યામ અવિનાશી...પ્રગટ૦ ૨
તેણે મુક્તિનાં દ્વાર ઉઘાડિયાં રે લોલ,
નરનારીને દેવા નિજ ધામ અવિનાશી...પ્રગટ૦ ૩
શુદ્ધ ધર્મ ધરા પર સ્થાપવા રે લોલ,
ઉખાડવા અધર્મનાં મૂળ અવિનાશી...પ્રગટ૦ ૪
નિજ જનને અખંડ સુખ આપવા રે લોલ,
પાવન કરવા ભક્તિધર્મકુળ અવિનાશી...પ્રગટ૦ ૫
આજ મોક્ષ આપવાને આવિયા રે લોલ,
બ્રહ્મમહોલવાસી હરિરાય અવિનાશી...પ્રગટ૦ ૬
મોટા મુક્ત મુનિ સાથે લાવિયા રે લોલ,
જેનાં દર્શન કર્યે પાપ જાય અવિનાશી...પ્રગટ૦ ૭
મોક્ષપતિ કુંવર ભક્તિ ધર્મના રે લોલ,
હરિકૃષ્ણ નારાયણ નામ અવિનાશી...પ્રગટ૦ ૮
વાલો તરત કાપે છે બંધ કર્મનાં રે લોલ,
પ્રેમાનંદનો સ્વામી ઘનશ્યામ અવિનાશી...પ્રગટ૦ ૯
