ઝૂલો હરિ હિંડોળે વ્હાલા, નટવર નંદતણા લાલા;

ઝૂલો હરિ હિંડોળે વ્હાલા, નટવર નંદતણા લાલા...ઝૂલો૦ ટેક. સરસ ઋતુ શ્રાવણની સારી, ઝુલાવીને આવી વ્રજનારી; ઝૂલો પ્યારા પ્રિતમ ગિરધારી...ઝૂલો૦ ૧ હિંડોળો રત્ન તણો રચિયો, હિરામોતી નંગ કરી ખચિયો; નંદજીને આંગણિયે મચિયો...ઝૂલો૦ ૨ મંદ મંદ મેહુલો ઘોરે, દામિનિયો દમકે ચહુકોરે; બોલે મોર મગન ઊંચે સ્વરે...ઝૂલો૦ ૩ ઝુલાવું હેત કરી રસિયા, તમે મારા અંતરમાં વસિયા; પ્રેમાનંદ પ્યારા રસિયા...ઝૂલો૦ ૪