વહાલી લાગે છે વરણાગી તારી વાંકડી રે

વહાલી લાગે છે વરણાગી તારી વાંકડી રે		...ટેક.
લલિત ત્રિભંગી સુંદર શોભે, સુરનર મુનિનાં મનને લોભે;
	ચાલો ચાલ ચટકતી પે’રી ચાંખડી રે	...વહાલી૦ ૧
સુંદર હસિત વદનની વાણી, સુણતાં વ્રજવનિતા લલચાણી;
	જોઈને મોહી અણિયાળી ચંચળ આંખડી રે	...વહાલી૦ ૨
નવલ મનોહર સુંદર છેલા, ઓરા આવોને અલબેલા,
	મળીએ મોહન બાંધી બાંયે રાખડી રે	...વહાલી૦ ૩
શ્રીઘનશ્યામ છબીના ધામ, પ્રેમાનંદ ભજે આઠો જામ,
	જોયાની લાગી છે નિશદિન ધાંકડી રે	...વહાલી૦ ૪