વારે વારે જાઉં વહાલાજી તારે વારણે રે

વારે વારે જાઉં વહાલાજી તારે વારણે રે		...ટેક.
આદિપુરુષ ઈશ્વર અવતારી, કરુણારસમય મૂર્તિ ધારી;
	પતિતપાવન પ્રગટયા આજ અમ કારણે રે	...વારે૦ ૧
નરનારી અગણિત અથડાતાં, ભવસાગરમાં ડૂબકાં ખાતાં;
	બળવંત બાંહ્ય ગ્રહીને કાઢયાં બારણે રે	...વારે૦ ૨
અધમઉધારણ નામના નામી, બિરુદ તમારું સદાયે સ્વામી;
	કીધું સત્ય કળીમાં બહુજન તારણે રે	...વારે૦ ૩
મળિયા પુરુષોત્તમ એમ જાણી, અચળ આશરો ઉરમાં આણી;
	પ્રેમાનંદ ઠરીને બેઠો ઠારણે રે		...વારે૦ ૪