માવા તારી મૂર્તિ જોઉં, માવા તારી મૂર્તિ જોઉં

માવા તારી મૂર્તિ જોઉં, માવા તારી મૂર્તિ જોઉં;
મૂર્તિ જોઉં અંતર પ્રોઉં, પ્રેમવતીના બાળ,
         હો ઘનશ્યામ મૂર્તિ જોઉં, માવા તારી મૂર્તિ જોઉં...ટેક
પાઘડી શિર ઉપર શોભે, તોરો લટકે તે માંય;
         ચોગઠ પાડીને છોગલાં મેલ્યાં, શોભા કહી ન જાય...હો ઘન૦ ૧
ભાલે તિલક કેસર કેરું, ચાંદલે કુંકુમ સાર;
         કાને કુંડળ હેમનાં રાજે, મણિ તણો ઝણકાર...હો ઘન૦ ૨
ભ્રકુટિ ભમરની પાંખ સરીખી, નેણકમળ ચિત્તચોર;
         કટાક્ષ કરીને કોરી લીધી, કાળજડાની કોર...હો ઘન૦ ૩
નાસા અણિયાળી નમણી લાગે, દીપક કીર સમાન,
         દાસ હરિના વાલમા તારું, ધરે મુનિવર ધ્યાન...હો ઘન૦ ૪