વાલીડાને જોઈને મોઈ, વાલીડાને જોઈને મોઈ;
જોઈને મોઈ પ્રેમથી પ્રોઈ, પેરાવું ફૂલના હાર,
હો પ્યારા જોઈને મોઈ, વાલીડાને જોઈને મોઈ...ટેક
ફૂલ ડોલરિયા ચંપા ચમેલી, ગેહેરે રંગે ગુલાબ;
સારા સેવતી મોગરા કેરા, ભાવે ભરી લાવું છાબ...હો પ્યારા૦ ૧
બાજુ જડેલ મોંઘે મોતીડે, બાંધી લીધા બેઉ બાંય;
બહુ શોભે રૂડા બેરખા કાજુ, કનક કડાં કરમાય...હો પ્યારા૦ ૨
ઉપરણી ખભા ઉપરે ઝગે, જરકસી જામાની ચાળ;
કટી કંદોરો હેમનો બન્યો, જોયા જેવો તાળ...હો પ્યારા૦ ૩
રેંટો ગૂઢા રંગનો કમરે, કસિયો કરીને પ્યાર;
દાસ હરિ દેખી ડોલરિયાને, વાર વાર બલહાર...હો પ્યારા૦ ૪
પુસ્તક :
હરિકીર્તન
ભાવ :
મૂર્તિ વર્ણન
રચયિતા :
હરિભાઈ દેસાઈ - ઓલિયા
આ કીર્તન માટે ઓડિયો અથવા વીડિયો હાલમાં ઉપલબ્ધ નથી.
જો તમારી પાસે આ કીર્તનનો કોઈ રેકોર્ડિંગ હોય અને હરીભક્તો માટે તેને શેર કરવા માંગતા હો, તો કૃપા કરીને અમને મોકલાવો.
કોઈ કીર્તન નથી!
www.swaminarayankirtan.org © 2026