જીવ તું કાયા ગઢનો રાજા રે, નગરમાં નોકર તારે ઝાઝા...ટેક
મન બુદ્ધિ ચિત્ત ચોથો અહંકાર, મેલી તારી માજા;
સૂબા સરક્યુલર કાઢે નવા, નિત લખે તુમાર તાજા રે...જીવ૦ ૧
કામ ક્રોધ લોભ નાટક નવા ખેલ, કરતા લેશ ન લાજા;
પંચવિષયના વાગે પુરમાં, પોનુગ્રાફ વાજાં રે...જીવ૦ ૨
દસ અમલદાર દેશ ફરનાર, ને બારવટિયા બાજા;
તૃષ્ણા તોપના ગોળા છૂટે, એમાં શાના રહે સાજા રે...જીવ૦ ૩
હજૂરી હુકમ આપી કર્યા તેં, કારભારીના આજા;
દાસ હરિ કે દિવાળું દરબારે, સૂબા સર્વે તાજા રે...જીવ૦ ૪
રચયિતા :
હરિભાઈ દેસાઈ - ઓલિયા
ભાવ :
ઉપદેશ
પુસ્તક :
હરિકીર્તન
આ કીર્તન માટે ઓડિયો અથવા વીડિયો હાલમાં ઉપલબ્ધ નથી.
જો તમારી પાસે આ કીર્તનનો કોઈ રેકોર્ડિંગ હોય અને હરીભક્તો માટે તેને શેર કરવા માંગતા હો, તો કૃપા કરીને અમને મોકલાવો.
કોઈ કીર્તન નથી!
www.swaminarayankirtan.org © 2026