કદી રંગે રમે મહારાજ રે, ધ્યાન ધરાવાને કાજ રે

કદી રંગે રમે મહારાજ રે, ધ્યાન ધરાવાને કાજ રે;
         સંતો-ભક્તોના પાડે બે તડા રે, શ્રીજી રહે થઈ વડા રે...૧
જે હારે તેની ભેર તાણે રે, નિર્બળ બળમાં આણે રે;
         કદી સખા રાખી નિજ સાથ રે, રમે છે સંતની સાથ રે...૨
સંતો પિચકારી ચલાવે રે, વાલમજીને મૂંઝાવે રે; 
         સંગે સખા તે કાંઈ નવ ફાવે રે, વાલો લીંબ ચડી જાવે રે...૩
આવ્યા નિત્યાનંદ તેહ વારે રે, કાઢી લીધાં કડાં ત્યારે રે;
         વાલો બોલ્યા છે કરીને હાસ રે, હાર્યા અમે તમ પાસ રે...૪
સંતો ફગવા તરીકે તમ સાથ રે, ભેટશું ભરીને બાથ રે;
          જ્ઞાનસખી કે’ રંગથી રાતા રે, સહુ ભેટયા હરખાતાં રે...૫