અધ મહિના પ્રારભ્યતે
પદ ૭૭ મું-રાગ મારુ(૧/૧)
કહાવે સંદેશો વ્રજનાર રે ઉદ્ધવજી સાથે, થયા નિરદયી
નંદકુમારરે ઉદ્ધવ અમ માથે;
ઉદ્ધવ કેહેજો એટલુંરે જઇને જીવન પાસ, દીલાસે દુ:ખીયાં
થયાં રહ્યાં કપટીને વિશ્વાસે રે. ઉદ્ધ૦ ટેક.
ચઇતર માસેરે ચિંતા થઇ ચઇતર માસેરે, * ચઇતરે ચિંતા થઇ
ઘણીરે શ્યોરે કરું ઉપાયે;
વિયોગે વલખી ફરું મારા પાપી પ્રાણ ન જાયે રે. ઉદ્ધ૦ ૧
વાયા વૈશાખેરે વાવલીયા વાયા વૈશાખે રે, વૈશાખે વરસે
ઘણીરે ગ્રીષમ રુતુની ઝાળ;
નીરવિના જેમ માછલી તેમ દુ:ખીયાં અમે ગોપાલ રે. ઉદ્ધ૦ ૨
જેઠે જાણ્યુંરે ઉધા અમે જેઠે જાણ્યું રે, જેઠે જાણ્યું
નહીં જીવુરે જાદવ વિના જરુર;
દાહ દેવાને મેલજો તમે વળી વેહેલો અકરુર રે. ઉદ્ધ૦ ૩
અસાડે ના આવ્યારે ઉદ્ધવજી અસાડે ના આવ્યારે,
ના આવ્યા અસાડે નાથજીરે ગરજ્યો મેઘ મલાર;
પરદેશે વિલમિ રહ્યા કોઇ મળીરે ઠગારી નાર રે. ઉદ્ધ૦ ૪
શ્રાવણ વરસેરે સરવડીએ શ્રાવણ વરસેરે, શ્રાવણ વરસે
સરવડેરે બોલે ચાત્રુક મોર;
કોકિલા ટઉકે ઘણી મને વિરહ સંતાપે છે જોર રે. ઉદ્ધ૦ ૫
રેણ અંધારીરે ભાદરવાની રેણ અંધારીરે,
રેણ અંધારી હું એકલડીરે ગરજે ભાદર માસ;
વિજલડી ચમકા કરે નહીં પ્રાણ રહ્યાની આસ રે. ઉદ્ધ૦ ૬
આશા લાગીરે આસો માસે આશા લાગીરે, આશા લાગી
લાલનીરે જેમ તે ચંદ ચકોર;
જીવન જમુના કાંઠડે ક્યારે મળશે નંદકિશોર રે. ઉદ્ધ૦ ૭
_______________________________
*”ચિંતા ચૈત્ર માસેરે થઇ ચિંતા ચૈત્ર માસેરે, ” પાઠાન્તર છે.
કારતક માસેરે કહાવ્યું હરિએ કારતક માસેરે, કારતક માસે
કહાવ્યુંરે કપટ વચન બળવીર;
દીવાળી દુ:ખમાં ગઇ ન આવ્યા શ્યામ શરીર રે. ઉદ્ધ૦ ૮
માગસર માસેરે ઉધા હવે માગસર માસેરે, માગસર માસે
નહીં મળેરે મોહન સુંદરશ્યામ;
પ્રાણ સહિત અમે ત્યાગીશું ઉદ્ધવજી ગોકુલ ગામ રે. ઉદ્ધ૦ ૯
પોષે પેહેરીરે ઉધા અમે પોષે પેહેરીરે, પોષે પેહેરીને ચાલશુંરે
જોગણીયુંના ભેખ;
આવીને જગાવશું અમે મથુરામાં અલેખ* રે. ઉદ્ધ૦ ૧૦
માઘે મેલીરે ઉધા અમે માઘે મેલીરે, માઘે મોહન
કારણેરે મેલી લોકની લાજ;
જોગણ થઇ વ્રજવિનતા તમે આવો જોવા વ્રજરાજ રે. ઉદ્ધ૦ ૧૧
ફાગણ ફુલ્યોરે ઉધા હવે ફાગણ ફુલ્યોરે, ફાગણ ફુલ્યો
ફૂલડેરે મોર્યા આંબા મોર;
વિરહિની અંતર વેંધવા ફુલ્યાં કેસું નાહર નોર રે. ઉદ્ધ૦ ૧૨
અધિક માસેરે આવ્યા હરિ અધિક માસેરે, અધિક માસે
આવ્યારે રામકૃષ્ણની જોડ;
પ્રાણ સનેહિ શામળે પુર્યા ગોપીના સરવે કોડ રે. ઉદ્ધ૦ ૧૩
જે કોઇ ગાયેરે પ્રીતે કરી જે કોઇ ગાયેરે, જે કોઇ ગાયે
ને સાંભળેરે પ્રીતે બારે માસ;
પ્રેમાનંદનો નાથજી તેને આપશે વૈકુંઠે વાસ રે. ઉદ્ધ૦ ૧૪
ઇતિ મહિના સંપૂર્ણ