રાગ પરજ પદ-૧-૧૯પ
પાછી આપો તમારો પાડરે, મારી ધોરાજીની ધાબળી.
સુતાં બેઠાં સાંભળે મુને ધાબળી ધોળી ફૂલ.
દશ રૂપૈયા દેતાં ન મલે, એવી હતી અમૂલરે. મા. ૧
સુંવાળીને સુતર સરખું, ઝીણા પોતી જોર,
ડોસે ભકતે દેહ મૂકયો, ભાઇ તેણે બાંધી'તી કોરરે. મા. ર
ચોળ રંગની ચટકીદાર, ઉન હતી અનુપ,
ઝીણી ઝીણી ત્રિબે ખીલી, તેમાં થૈ તદરૂપરે. મા. ૩
કાળી રુપાળી કોરે શોભે, લોભે જોઇ મન,
ઓઢી બેસતાં અંતર માંઇ, ખરચું ન ખટકે ધનરે. મા. ૪
પાઠ કીધાનું પુસ્તક દીધું, લીધું તેનું ધન,
કાલાવાલા કોડય કર્યા છે, તે જાણે છે મારું મનરે. મા. પ
એકના અઢી રોકડા આવ્યા, બીજાના આવ્યા બે,
અરધો જેમ તેમ જોડયો, એ પાંચ પુરાની છે રે. મા. ૬
કામળી બળતી કેમ દેખાશે, થાશે મારું મરણ,
બાળોમાં એ બાંધી મૂકો, માંડ ફરે પ્રકરણરે. મા. ૭
અજાણે હું તો ઓઢી આવ્યો, કળ ન પડી કાંયે,
હવેની જો હાથ આવે તો, ઘાલું હું ગોદડી માંયેરે. મા. ૮
આજ પછી તો એમ નહિ કરું, ખૂબ વળી છે લાજ,
નામું વાળું તો નરસું લાગે, આપો પાછી આજરે. ૯
ધાબળી રાંડ ધુંધવી ઉઠી, ખમી ન શકી ખોટય,
બળતી જળતી બોલવા લાગી, લઇ મોટાની ઓટયરે. મા. ૧૦