હું બલહારી એ વૈરાગ્યને, ઉપન્યો જેને અંગજી
ચૌદ લોક જે ચતુરધા, ન ગમે સુખનો તે સંગજી, હું.૧
સુખ ન ઇચ્છે તે સંસારનાં, સમજે સુપના સમાનજી,
વાત ગમે એક વૈરાગ્યની, તન સુખ ત્યાગવા તાંનજી. હું. ર
દુઃખી રે દેખે આ દેહને, રહે રાજી તે મનજી,
અનરથનું એ અગાર છે, જાણી ન કરે જતનજી.હું. ૩
રાત્ય દિવસ રુદિયામાંયે, વરતે એમ વિચારજી,
અહો હું રે કોણને જાઇશ કિયાં, કરુ તેનો નિરધારજી.હું. ૪
કરું ઉપાય હવે એહનો, ડોલી દેશ વિદેશજી,
કોયરે ઉગારે મન કાળથી, સોપુ તેને લઇ શિશજી.હું. પ
રહે રે આતુરતા અંતરે, દેખી દેહ અનિત્યજી,
સુખ ન માને આ સંસારમાં, ન કરે કોયેશું પ્રીતજી.હું. ૬
એવી દશારે આવ્યા વિના, નોય તન સુખ ત્યાગજી,
ઉપરનો લાગે રે લજામણો, વગોણા સરખા વૈરાગ્યજી.હું. ૭
હરિ ગુરુ દેવ દયા કરી, આપે એહ વિચારજી,
નિષ્કુળાનંદ એ નિઃશંક થઇ, સેજે તે તેરે સંસારજી.હું. ૮