આ ચાતુરીઓ ચોવીસ છે, તેમાં પ્રગટની લીલા કઇ;
જથારથ કેવા કારણે, નથી શેષ શારદ તે સહી. ૧
અલ્પમતિ કવિ કે' અતિ, હરી લીલા અપરંપારને;
પિંગળ કાવ્ય જોયા વિના, કવિ શું કરે ઉચારને. ૨
પણ નિજ મતી અનુસારથી, કહી પ્રગટ લીલા કથી;
જથારથ કેવા કવિ, કોટી બ્રહ્માંડમા કોઇ નથી. ૩
પુરુષોત્તમ અક્ષરપતિ, અવતારના અવતારી છે;
કારણ પ્રેરક સર્વના કાળે, તેની લીલા વિસ્તારી છે. ૪
એમ જાણી મહારાજને, આ ચાતુરીઓ જે મુખ ગાય છે;
માયા માથે પગ દઇ, તે જરૂર ધામમાં જાય છે. ૫
દૈવી સંપતિ જીવ જક્તમાં, તે ગાવે ભાવે ભરી;
આસુરી સંપતિ અસુરને, નાવે અરથમાં આ જરી. ૬
દૈવી જીવ જે જક્તમાં, અને પ્રગટના કૈયે વળી;
તેને આ મળતી આવશે, જેમ પયમાં સાકર ભળી. ૭
પય સાકરને જે પીએ, તે સુખી થાય બહુ તનમાં;
તેમ ચાતુરીઓ શીખે સાંભળે. થાય સુખી બહુ તનમાં. ૮
પણ નાવે આસુરીને અરથમાં, તે ઉપર દ્રષ્ટાંત દીજીયે;
જેમ મીસરી ધૃત ખાય કીટ તો, તે તરત પ્રાણ તજી દિયે. ૯
સાકર શત્રુ છે ખરને, અને ગોળ ગીંગો તે નવ જમે;
જવાસો સુકે જળથી, તેમ આસુરીને આ નવ ગમે. ૧૦
એમ હરિજન જાણીને, નવ આપો આસુરીના હાથમાં;
સત્સંગની મર્યાદામાં રહી, શીખો સુણો સંત સાથમાં. ૧૧
સવંત ઓગણીશ સત્તરો, માસ અષાઢ તે જાણો સહી;
કૃષ્ણપક્ષે ગુરુ વાસરે, આ ચાતુરીઓ પુરી થઇ . ૧૨
સાભર તીરે સોયામણું, શ્રીનગર નૌતમ ધામ છે;
નર વીરની સમીપે કરી અવિનાશાનંદ નામ છે. ૧૩
જેતલપુરમાં કરેલી લીલાનું વર્ણન.