પદ ૨
પદ ૨૦
સુણો સૌ નરનારી, આશ્ચર્યકારી, મોહનનો મહિમાય;
કથે વેદ ઉચ્ચારી , ગુણ વિસ્તારી, મોહનનો મહિમાય ટેક.
શેષ મહેષ સુરેશ ગણેશ, અજ અમર ગુણ ગાય;
નારદ શારદ પાર ન પામે, ચરણ સેવે સદાય રે-સુણો.૧
મન વાણી જેનો પાર ન પામે, નેતિ કહે છે નિગમ,
અખિલેશ્વર અખંડ અનાદિ, પુરુષોત્તમ પરિબ્રહ્મ રે.-સુણો.૨
અનંતકોટિ બ્રહ્માંડ રહ્યાં છે, રોમ તણે આધાર;
તે અક્ષરના આપ નિયંતા, ભક્તિ ધર્મના કુમાર રે-સુણો.૩
જીવ કોટિ ને ઇશ્વર કોટિ, મુક્ત કોટિ જે અપાર;
તેના નિયંતા નાથ તમે છો, દિવ્ય સદા સાકાર રે-સુણો.૪
કાળ માયાદિ કોટિક શક્તિ, થર થર કંપે કાય;
હાથ જોડીને હાજર રહે છે, હુકમ પાડે સદાય રે-સુણો.૫
વરૂણ વિદ્વાન વચન પાળે, પાળ વિના રહે નીર;
સુર્ય શશિ નિત્ય ફરતા રહે છે, રાત દિવસ અચીર રે.સુણો.૬
જેના વરસાવ્યા મેધ જ વરસે, વસુંધરા રહે સ્થિર;
અધર તારા મંડળ રમે છે, સુંદર વાય સમીર રે.સુણો.૭
કોટિક જીવનાં કલ્યાણ કરવા, પ્રગટ્યા પૃથ્વીમાંય;
નારણદાસના નાથ હમારી, સહાય કરોને સદાય રે.સુણો.૮