હરિ છે ને હરિ કરે છે, હરિને માને છે નર ને નાર

હરિ છે ને હરિ કરે છે, હરિને માને છે નર ને નાર; ફળ ને યશ પ્રભુ તને મળો, અતિ ઉંચા જ્ઞાન આ વિચાર...૧ કર્તાહર્તા તમે એક છો, તમે કરો છો બધું કાજ; કહો કથા ને સુણો હરિ, મારા પ્યારા પ્યારા મહારાજ...૨ આનંદ તમારો આપજો, અમને દિવસ ને રાત; વાલમ તમને વીનવીએ, કરો મધુરી કાંઈક વાત...૩ તમારામય અમને રાખજો, ને ટાળજો અમારાં પાપ; તમે જ અમારા સખા બંધુ, તમે જ મા ને બાપ...૪ પ્રગટ છો સદા સર્વદા, તમે સર્વત્ર મારા શ્યામ; કૃપા કરો એવું અનુભવું, તમને હું આઠો જામ...૫ કર્તા તમે એક હોવાથી, સર્વ મળો તમને ફળ; અમે તો વાલા ભોગવીએ, આપનો આનંદ કેવળ...૬ પામવું છે એક તુજને, ભલે બધું જ છૂટી જાય; એક જ ઇચ્છા ઉર છે, બસ પિયા તુને મળાય...૭ તેજોમય છે આકાર તારો, અમે ધરીએ એનું ધ્યાન; દયા કરી આપો વિભું, તમારું અનુભવ જ્ઞાન...૮ ધર્મરક્ષક ધર્મપુત્ર, ધર્મપ્રચારક મારા નાથ; ધર્મ પ્રચારવા ધરતી પર, પધાર્યા મુક્ત સંગાથ...૯ કર્તાહર્તા છો એક તમે, અમે અકર્તા સદાય; તમથી કે’વાય ને સુણાય, કેવળ નિમિત્ત સહુ ગણાય...૧૦ નિજજનને સુખ આપિયાં, તમે પ્રગટ પુરુષોત્તમ; કેવળ કૃપા કરી પ્રગટયા, ટાળવા માયા તમ...૧૧ તમારાથી જ અમે પ્રભુ, સુખી છીએ સનાથ; કર્તા રહી સુખ દેજો, હરિ ઝાલજો મારો હાથ...૧૨ આનંદઘન દિવ્ય મૂરતિ, હે અદ્વિતીય ! સુખધામ; માતા પિતા ગુરુ બંધુ સખા, મારા વાલા શ્રી ઘનશ્યામ...૧૩ સર્વકર્તા છો એક તમે, નથી જગમાં બીજો કોઈ; જે જે થયું ને થાય છે, તે આપે કરેલું જ હોય...૧૪ તમ વિના મારું કોઈ નથી, હે સર્વોપરી મારા નાથ; તવ શરણે આવ્યો પ્રભુ, તમે ઝાલજો મારો હાથ,...૧૫ અનંત બ્રહ્માંડ કે સ્વામી, મેરે પ્યારે શ્રી ઘનશ્યામ; વિનંતી કરતા હું આપકો, અબ ખુશ રહો આઠો જામ...૧૬ આનંદ અમને આપજો, સુખદાયક જગદાધાર; આત્માના આત્મા તમે, છો પ્રાણના પ્રાણઆધાર...૧૭ અણુ અણુમાં બિરાજો છો, સર્વનિયંતા મારા માવ; કૃપા અમ પર કરો એવી, હવે પંચવિષયથી છોડાવ...૧૮ સ્વતંત્રમૂર્તિ શ્રીહરિ, શું કહું તમને વાત; અંગોઅંગમાં શ્રીજી તમે, બિરાજોને સાક્ષાત...૧૯ સેવકની ચિંતા સ્વામીને, સેવકને નહિ કાંય; એવું ઇચ્છીએ હરિ અમે, બસ તમારા રહેવાય...૨૦ અમારે તો બસ હે હરિ !, આવવું છે તમારે કામ; આપો અનુભવ આપનો, બીજું આપો નહીં ઘનશ્યામ...૨૧ સુખસાગર ઘનશ્યામ પિયા, તમે પ્રગટ છો સાક્ષાત; અમ હિતે સુખકંદ તમે, સદાયે કરો છો વાત...૨૨ હે સત્ય સંકલ્પમૂર્તિ !, તમે ક્ષર અક્ષરથી પર; આવી અમારો હાથ ઝાલ્યો, તમે થયા અમારા વર...૨૩ સર્વપ્રકાશક એક છો, બધે કરો છો તમે પ્રકાશ; સદા કરો છો ને કરશો, મારે છે તમારી આશ...૨૪ સર્વકર્તા તમે એક જ છો, બધું કરો છો કામ; સદા કરો છો ને કરશો, બસ અમારે છે આરામ...૨૫ સર્વકર્તા તમે એક જ છો, આ વાત સ્વીકારાઈ જાય; કૃપા કરો શ્રીજી એટલી, તમે મારા શ્રીહરિરાય...૨૬ સર્વના સાક્ષી આપ છો, આપોને મને આનંદ; હુંમાં ને સર્વ જનમાં, અનુભવું સહજાનંદ...૨૭ સુંદરવર ! તમે મળજો, બીજું ટળજો મારું તમામ; તમારો છું તમારા માટે છું, હું કરું તમારું જ કામ...૨૮ મન મારું મૂર્તિમાં રહે, સદા કરી હરિ વાસ; હાથ જોડી વિનંતિ કરું, પિયુ દેજો એટલું ખાસ...૨૯ હે મારા અંતરવાસી, પુરુષોત્તમ ભગવાન; સર્વકર્તા તમે એક છો, એવું દેજો અનુભવ જ્ઞાન...૩૦ આનંદ દેજો આપનો હરિ, રાખજો મૂરતિમાંય; બીજું કાંઈ નથી માગતો, તમ અર્થે શ્વાસ લેવાય...૩૧ અંતર્યામી હું તારો છું, ને તારો જ રાખું વિશ્વાસ; દઢ ભરોસો હરિ માહરે, મારા વહે તુંમાં સહુ શ્વાસ...૩૨ કર્તા ભર્તા તમે એક છો, અકર્તા અમે સદાય; ભૂત ભવિષ્ય વર્તમાનમાં, તવ કર્તૃત્વ સ્વીકારાય...૩૩ દિવ્ય ચૈતન્યમૂર્તિ, કોટી બ્રહ્માંડ રાજાધિરાજ; અનુભૂતિ આપની પિયા, થઈ રહી છે મને આજ...૩૪ આનંદ આનંદ એકલો, સર્વત્ર રહ્યો અનુભવાય; સુખ સદાય રહે આપનું, એ જ એક ચિત્ત ચહાય...૩૫ દુ:ખદાયક આ માયા તારી, એ મહામોટું બંધન; બંધન છોડાવો હે પિયા, મારું રાખો તમારામાં મન...૩૬ દિવ્ય મતિ તમે આપજો, ને ટાળજો માયિક ભાવ; તવ દષ્ટિએ તુજને જોઈએ, રહો સર્વત્ર એક માવ...૩૭ હે સુખધામ મારા આત્મા, તમે છો મારો આરામ; આદ્યે અંતે મધ્યે પિયુ, તમે જ મારો વિશ્રામ...૩૮ દયા દિલમાં હરિ રાખજો, ને ગુના કરીને માફ; અંતર અમારું વાલમા, તમે જ કરજોને સાફ...૩૯ પ્રાર્થના કરું પ્રભુ તમને, આપ્યું છે પાત્રતા ઉપરાંત; પાત્રતા આપો પ્રભુ તમે, તો દિલમાં થાય નિરાંત...૪૦ કર્તા-હર્તા તમે એક છો, આદિ અંતે મધ્યે સોય; સાકારમૂર્તિ તુજ વિના, કર્તૃત્વ ક્યાંય ન હોય...૪૧ પંચવિષયથી પ્રીત તોડાવી, જોડી દેજો તુંમાં નાથ; એ જ માગું છું તમ પાસે, તમે દેજો મારા પ્રાણનાથ...૪૨ મળવું છે મોહન તમને ને, રાખવી છે અખંડવૃત્તિ; રાજી કરવા છે આપને, પાળીને તમારી અનુવૃત્તિ...૪૩ અનંત કોટી બ્રહ્માંડ ઊડે, તવ રોમમાં અણુને ઠામ; સર્વત્ર એક તમે બિરાજો, મારા પ્યારા શ્રી ઘનશ્યામ...૪૪ કર્તા-હર્તા તમે નાથજી, મને રહોને વાલા યાદ; અનુકંપા એવી જ કરો, આપો એવા જ આશીર્વાદ...૪૫ પળ ન ભૂલીએ પિયુ તને, તમે રહોને અખંડ યાદ; એક સેકન્ડ ભુલાય તો, જીવન મનાય બરબાદ...૪૬ ચિદ્‌ અચિદ્‌ વિશિષ્ટ છો, પરબ્રહ્મ સર્વાધાર; અંતિમ સત્ય શ્રીહરિ, સર્વાત્મા જગદાધાર...૪૭ જ્યાં જ્યાં વૃત્તિ જાય માહરી, ત્યાં દેખાઓ પૂરણકામ; અંદર બહાર સર્વત્ર રહે, તવ અનુભવ આઠોજામ...૪૮ લળી લળી વંદું આપને, દયા કરોને મારા બાપ; તુજ વિના સર્વે વાસના, પ્રભુ ટાળોને મારાં પાપ...૪૯ તમને સેવીએ ને ભજીએ, હરપળ રટીએ નામ; પાંદડું જેમ પાણીમાં વહે, એમ વહેતા રહીએ શ્યામ...૫૦ સર્વાધાર મારા શ્રી હરિ, તુજ વિના નથી ઉદ્ધાર; દયા રાખજો દીનબંધુ, કરજો અમારો બેડો પાર...૫૧ આપો આનંદ એક આપનો, બીજું ન દેશો કાંઈ; તો રાજી છો એમ જાણીએ, નહિ તો હરિ રાજી નાઈ...૫૨ મળવા થયા છો ઉતાવળા, આજ સામેથી તમે નાથ; ભાગ્ય અમારાં શું વર્ણવું, અમે થયા છીએ સનાથ...૫૩ મેલી હવે જો તમને, અને બીજું ઇચ્છીએ કાંઈ; તો તો અમારી હે હરિ, મોટી છે કઠણાઈ...૫૪ સદ્‌બુદ્ધિ હરિ આપજો, ને કેવળ આપજો સુખ; તુજ વિના મને વાલમા, સર્વત્ર જણાય દુ:ખ...૫૫ નીકળ્યા છીએ તુંને પામવા, પમાડી દેજે તું નાથ; આડા અવળા નવ થાઈએ, સદા રહીએ તુજ સંગાથ...૫૬ ભૂલ ભરેલા છીએ અમે, કરતાં આવ્યા છીએ ભૂલ; પણ તારાં ચરણમાં અર્પાવું, અમારે તો બની ફૂલ...૫૭ ભૂલો અમારી સુધારજો, ભલેને દિયો હરિ દંડ; પણ દૂર તમથી કરશો નહિ, રાખજો હજૂર અખંડ...૫૮ જન્મોજન્મથી તને મળવા, મહેનત કરું છું નાથ; મુજ મે’નતથી તું નહિ મળે, તું જ કૃપાથી ઝાલ્ય મારો હાથ...૫૯ સર્વ પ્રકાશક શ્રી હરિ, તમે જેમ પ્રકાશશો એમ; તમારી મરજીમાં જ રે’વું છે, તવ રુચિમાં રાખજો તેમ...૬૦ આપ ભૂલી તમ બળમાં, કોઈ ભક્ત જીવે જીવન; રાજી થઈ તમે શ્રી હરિ, તેને આપી દ્યો છો નિજ તન...૬૧ હે દયાળુ મૂરતિ, તવ દાસન કો મૈં દાસ; કૃપા કિયો મુજ પર હરિ, સદા રખિયો તવ પાસ...૬૨ અમ બાળકની હે હરિ, માફ કરજો તમે ભૂલ; તવ વચન નવ લોપીએ, એવું સમજાવોને મૂલ...૬૩ સદા સાકાર મૂરતિ હરિ, તમે હેત કર્યું છે અપાર; તમે રાખ્યું મારું જેટલું, એવું રાખશે ન કોઈ આ વાર...૬૪ રાજી રહેજો મારા આતમા, જાણજો તમારા સદાય; છોરું કછોરું થાય પણ, માવતર કમાવતર ન થાય...૬૫ રાજી કર્યે બહુ રાજને, તેની સર્વે પ્રજા રાજી થાય; એમ પૂજ્યે પુરુષોત્તમને, સરવે દેવ પૂજાય...૬૬ તમે જ સુખદાતા હરિ, તમે જ અંતે વિરામ; સર્વનિયંતા નાથજી, મારે તમારું જ છે કામ...૬૭ સ્નેહી છો ભવોભવના, મને ગમે છે તારી રીત; જોયા જે દિ’થી મેં તમને, તે દિ’થી થઈ છે પ્રીત...૬૮ સુખકારી હરિ મૂર્તિ, આનંદ આપે છે તવ ધ્યાન; વૃત્તિઓ તમોમાં લીન રહે, એવી દયા કરો ભગવાન...૬૯ તમે જ માતા પિતા સખા, તમે જ બંધુ ને નાથ; સુહૃદ ગુરુ અને આતમા, તમે સર્વસ્વ સુખપાથ...૭૦ અનંત જીવના સ્વામી તમે, સર્વાધાર ને અનાધાર; કારણનાં કારણ અકારણ, અજીત અખંડ અપાર...૭૧ સદા સાકાર દિવ્ય મૂર્તિ, સદા સત્ય તમારો આકાર; અન્ય આકાર નાશવંત છે, એવું જાણી કર્યો તુંમાં પ્યાર...૭૨ મદદે આવજો હે હરિ, રાખવા છે તમને સદાય; પળાય મરજી આપની હરિ, મૂર્તિ પળ ન ભુલાય...૭૩ સુપ્રિમ પાવર મારા નાથજી, તમે મારા પિયુ પ્રીતમ; માગું છું તમ પાસે વાલમા, એક જ તમને પુરુષોત્તમ...૭૪ સર્વકર્તા શ્રીજી એક હો, દૂજો ન દેખ્યો કોઈ; સબકે માલિક આપ હો, ઔર નહિ હૈ કોઈ...૭૫