વડતાલવાસી હરિકૃષ્ણ મહારાજ

વડતાલવાસી હરિકૃષ્ણ મહારાજ, રૂપ તમારું તમે સ્થાપ્યું જીરે;
           સ્વયં સ્વેચ્છાથી બેઠા વડતાલમાં, સંતોને બહુ સુખ આપ્યું જીરે...ટેક.
ધામ કેરી મૂર્તિ ને વડતાલની મૂર્તિ;
એક જાણી ભૂલું નહિ કદી મારા ઉરથી;
           અખંડ સ્વરૂપ દિલ રાખ્યું જીરે...વડતાલ૦ ૧
મંદમંદ હસતું મુખડું રૂપાળું;
હરિકૃષ્ણ રૂપ તારું અતિશે તેજાળું;
           તેજાળી મોટી મોટી આંખ્યું જીરે...વડતાલ૦ ૨
વાદળી વાઘામાં તમે શોભો છો સારા;
પ્રાણથી એ નાથ તમે લાગો છો પ્યારા;
           કોટી પે’રીને મન ખેંચ્યું જીરે...વડતાલ૦ ૩
બ્રહ્માંડે નથી તારી જોડ મારા વાલા;
જ્ઞાનજીવન કહે કોટિ કરી કાલાવાલા;
           તમે અમારું બહુ રાખ્યું જીરે...વડતાલ૦ ૪