વડતાલધામના હરિકૃષ્ણ મહારાજ

વડતાલધામના હરિકૃષ્ણ મહારાજ, તમારું મુખ મેં ચૂમ્યું જીરે;
           અંગોઅંગ ભેટતા પ્રીતમજી તમને, દલ મારું આનંદે ઝૂમ્યું જીરે...ટેક.
કાને બેઠા છે તારે હીરલાના મોર; તે છે પિયુડા મારા ચિત્ત કેરા ચોર;
                                  પાઘડીને હીરે ચિત્ત ચીર્યું જીરે...વડતાલ૦ ૧
કર કેરે લટકે ને આંખ્ય કેરે મટકે; વીંધી નાખ્યું દિલ મારું રાત-દિન ખટકે;
                                 જોઈ ખેસ બહુ સુખ આવ્યું જીરે...વડતાલ૦ ૨
ધીરે ધીરે ચાલો ને મંદ મંદ હસો; આવા ને આવા હરિ દિલ મારે વસો;
                                 હસી તમે દુ:ખ મારું કાપ્યું જીરે...વડતાલ૦ ૩
માધુરી મૂર્તિ તારી દિલમાં મેં ધારી; સર્વોપરી છો તમે સર્વાવતારી;
                                 જ્ઞાન શાસ્ત્રમાં બહુ દાખ્યું જીરે...વડતાલ૦ ૪