ગઢપુર ગામ કર્યું અક્ષરધામ રે, અનાદિ મુક્ત વસ્યા એહ

ગઢપુર ગામ કર્યું અક્ષરધામ રે, અનાદિ મુક્ત વસ્યા એહ ઠામ રે... ટેક
એવા મુક્તને રહેવાનું ધામ રે, સચ્ચિદાનંદ ને પૂરણકામ રે;
         તેનું જાણો અક્ષર એવું નામ...ગઢપુર૦ ૧
એ અક્ષરની મોટપ શી કહું રે, અપારનો પાર કેમ લહું રે;
         એક રોમે બ્રહ્માંડ રહે બહુ...ગઢપુર૦ ૨
ઊડે એક રોમે કોટિ અંડ રે, એવું એ અક્ષરબ્રહ્મનું પંડ રે;
         વસે પુરુષોત્તમ ત્યાં અખંડ...ગઢપુર૦ ૩
એહ સગુણ નિર્ગુણ રૂપ ધારી રે, કરે ઉત્પત્તિ અનંત પ્રકારી રે;
         કાર્ય કારણ ને અવિકારી...ગઢપુર૦ ૪
ભવ બ્રહ્મા વિષ્ણુ ગુણ ત્રણ રે, અનિરુદ્ધ પ્રદ્યુમ્ન સંકર્ષણ રે;
          સગુણ સ્વરૂપ એ છ જણ...ગઢપુર૦ ૫
બદ્રિપતિ ને વાસુદેવ જાણો રે, લક્ષ્મીપતિ ને શ્રીકૃષ્ણ પ્રમાણો રે;
         ચારેય નિર્ગુણ સ્વરૂપ વખાણો...ગઢપુર૦ ૬
અંડ અંડ પ્રત્યે એ દસ રૂપ રે, અધિપતિ એ ઈશ્વરના સ્વરૂપ રે;
         એવા બ્રહ્માંડ કોટિ અનુપ...ગઢપુર૦ ૭
ઈશ્વર કોટિ રહે જે આધારે રે, જેને વંદે છે નિત વેદ ચારે રે;
          દાસ હરિ મળવા ઇચ્છા ધારે...ગઢપુર૦ ૮